Heimildamyndin Með hangandi hendi um Ragnar Bjarnason var tilnefnd til Edduverðlaunanna 2011. Hér er á ferðinni hugljúf heimildamynd sem sýnir allar hliðar þessa dáða söngvara og alþekkta grallara.

Ragnar Bjarnason stendur á tímamótum þar sem hann siglir inn í 75. aldursárið, árið sem einnig markar 60 ára starfsafmæli hans. Í kvikmyndinni er skyggnst á bakvið ímynd söngvarans „Ragga Bjarna“ og ferill hans skoðaður sem spannar nánast alla sögu íslenskrar dægurtónlistar. Við fylgjum Ragnari eftir við undirbúning fyrir stórtónleika í Laugardalshöll og fáum aðgang að hans daglega lífi.

Heimildamyndin varpar ljósi á manninn á bak við hinn goðsagnakennda og síunga rokkara og rifjar upp skrautlegt lífshlaup hans.